Sir 13
1ⲡⲉⲧϫⲱϩ ⲉⲩⲗⲁⲙϫⲁⲧⲡ ϥⲛⲁⲧⲱⲗⲙ ⲁⲩⲱ ⲡⲉⲧⲙⲟⲟϣⲉ ⲙⲛ ⲟⲩϫⲁⲥⲓϩⲏⲧ ϥⲛⲁⲉⲓⲛⲉ ⲙⲙⲟϥ 2ⲙⲡⲣϥⲓϩⲣⲏϣⲉ ⲡⲁⲣⲁ ⲧⲉⲕϭⲟⲙ ⲁⲩⲱ ⲙⲡⲣⲕⲟⲓⲛⲱⲛⲓ ⲙⲛ ⲟⲩϫⲱⲱⲣⲉ ⲁⲩⲱ ⲟⲩⲣⲙⲙⲁⲟ ⲉϩⲟⲩⲟ ⲉⲣⲟⲕ ⲟⲩ ⲧⲉ ⲧⲕⲟⲓⲛⲱⲛⲓⲁ ⲛⲟⲩϭⲁⲗⲁϩⲧ ⲙⲛ ⲟⲩⲭⲁⲗⲕⲓⲟⲛ ⲉϥϣⲁⲛϫⲱⲣⲡ ⲉⲣⲟⲥ ⲥⲛⲁⲟⲩⲱϭⲡ 3ⲡⲣⲙⲙⲁⲟ ⲉϥϫⲓ ⲛϭⲟⲛⲥ ⲛⲧⲟϥ ⲟⲛ ⲡⲉϣⲁϥⲣⲡⲕⲉⲛⲟⲩϭⲥ ⲫⲏⲕⲉ ⲁⲩϫⲓⲧϥ ⲛϭⲟⲛⲥ ⲁⲩⲱ ⲛⲧⲟϥ ⲡⲉϣⲁϥⲣⲡⲕⲉⲥⲟⲡⲥ 4ⲉϣⲱⲡⲉ ⲉⲕⲣϣⲁⲩ ⲛⲁϥ ϣⲁϥⲣϩⲱⲃ ⲛϩⲏⲧⲕ ⲁⲩⲱ ⲉⲕϣⲁⲛⲣϭⲣⲱϩ ϥⲛⲁⲕⲁⲁⲕ ⲛⲥⲱϥ 5ⲉϣⲱⲡⲉ ⲟⲩⲛⲧⲁⲕ ϥⲛⲁⲙⲟⲟϣⲉ ⲛⲙⲙⲁⲕ ⲁⲩⲱ ϥⲛⲁⲡⲁϩⲧⲕ ⲛϥⲧⲙⲙⲕⲁϩ ⲛⲧⲟϥ 6ⲉϥⲁϩⲉ ⲛⲁⲕ ⲉⲉⲓⲉ ϥⲛⲁⲧⲣⲉⲕⲕⲱⲧⲉ ⲛϥⲥⲱⲃⲉ ⲛⲉⲙⲁⲕ ⲛϥϯ ⲛⲁⲕ ⲛⲟⲩϩⲉⲗⲡⲓⲥ [ⲛⲁⲛ]ⲟⲩ ⲛϥ[ϫⲟⲟⲥ ϫⲉ ⲡⲉ]ⲕⲁϩⲉ ⲛ[ⲟⲩ] 7[ⲁⲩⲱ ϥ]ⲛⲁϯϣⲓⲡⲉ ⲛⲁⲕ [ϩⲛ ⲛⲉϥϫⲓ]ⲛⲟⲩⲱⲙ [ϣⲁ]ⲛⲧϥⲡⲁϩⲧⲕ ⲛⲥⲟ[ⲡ ⲥⲛⲁⲩ ⲓⲉ] ϣⲟⲙⲛⲧ ⲁⲩⲱ ⲑⲁⲏ ⲛϥⲥⲱⲃⲉ ⲛ[ⲙⲙⲁⲕ] ⲛⲁⲩ ⲉⲣⲟⲕ ⲛϥⲟⲃϣϥ ⲛϥⲕⲓⲙ ⲛⲧⲉϥⲁⲡⲉ ⲉϫⲱⲕ 8ϯϩⲧⲏⲕ ⲉⲣⲟⲕ ⲙⲡⲣⲡⲗⲁⲛⲁ ⲛⲅⲑⲃⲃⲓⲟ ϩⲛ ⲧⲉⲕⲙⲛⲧⲁⲑⲏⲧ 9ⲉⲣϣⲁⲛⲟⲩϫⲱⲱⲣⲉⲙⲟⲩⲧⲉ ⲟⲩⲃⲏⲕ ⲥⲁϩⲧⲕ ⲙⲙⲟϥ ⲁⲩⲱ ϥⲛⲁⲙⲟⲩⲧⲉ ⲉⲣⲟⲕ ⲛϩⲟⲩⲟ 10ⲙⲡⲣⲉⲓ ⲉⲧⲟⲟⲧϥ ⲙⲏⲡⲟⲧⲉ ⲛϥⲙⲉⲥⲧⲱⲕ 11ⲙⲡⲣⲟⲩⲱϣ ⲉⲙⲟⲩⲧⲉ ⲉⲃⲟⲗ ϩⲏⲧⲕ ⲛⲉⲙⲁϥ ⲁⲩⲱ ⲙⲡⲣⲧⲁⲛϩⲉⲧ ⲡⲉϥⲙⲏⲏϣⲉ ⲛϣⲁϫⲉ ⲉⲃⲟⲗ ⲅⲁⲣ ϩⲛ ϩⲁϩ ⲛϣⲁϫⲉ ϥⲛⲁⲡⲉⲓⲣⲁⲍⲉ ⲙⲙⲟⲕ ⲁⲩⲱ ϥⲛⲁⲣⲑⲉ ⲛⲛⲉⲧⲥⲱⲃⲉ ⲛϥϫⲛⲟⲩⲕ 12ⲟⲩⲁⲧⲛⲁ ⲡⲉ ⲡⲉⲧⲉⲛϥϩⲁⲣⲉϩ ⲁⲛ ⲉⲛⲁϣⲁϫⲉ ⲁⲩⲱ ⲛⲉϥϯⲥⲟ ϩⲛ ϩⲉⲛⲙⲕⲁϩ ⲙⲛ ϩⲉⲛⲙⲣⲣⲉ 13ϯϩⲧⲏⲕ ⲉⲙⲁⲧⲉ ϫⲉ ⲉⲕⲙⲟⲟϣⲉ ⲙⲛ ⲡⲉⲕϩⲉ 14 15ⲉⲣⲉⲍⲱⲟⲛ ⲛⲓⲙ ⲙⲉ ⲙⲡⲉⲧⲉⲓⲛⲉ ⲙⲙⲟϥ ⲁⲩⲱ ⲣⲱⲙⲉ ⲛⲓⲙ ⲙⲡⲉⲧϩⲓⲧⲟⲩⲱϥ 16ⲉϣⲁⲣⲉ ⲧ ⲁⲩⲱ [ⲡⲣ]ⲱⲙⲉⲧⲟϭ 17ⲟⲩ ⲧⲉ [ⲧⲕⲟⲓⲛⲱ]ⲛⲓⲁ ⲛⲟⲩⲱⲛϣ [ⲙⲛ ⲟⲩ]ϩⲓⲉ[ⲓⲃ] ⲧⲁⲓ ⲧⲉ ⲑⲉ ⲛⲟⲩⲣⲉϥⲣⲛⲟⲃⲉ ⲙⲛ ⲟⲩⲣⲉϥϣⲙϣⲉⲛⲟⲩⲧⲉ 18ⲁϣ ⲧⲉ ϯⲣⲏⲛⲏ ⲛⲟⲩϩⲟⲉⲓⲧⲉ ⲙⲛ ⲟⲩⲟⲩϩⲟⲣ ⲁⲩⲱ ⲁϣ ⲧⲉ ϯⲣⲏⲛⲏ ⲛⲟⲩⲣⲙⲙⲁⲟ ⲙⲛ ⲫⲏⲕⲉ 19ⲛϭⲟⲣϭⲥ ⲛⲙⲙⲟⲩⲓ ⲛⲉ ⲛⲉⲓⲁⲛⲧⲟⲟⲩ ⲙⲡϫⲁⲉⲓⲉ ⲧⲁⲓ ⲧⲉ ⲑⲉ ⲙⲙⲁ ⲙⲙⲟⲟⲛⲉ ⲛⲛⲣⲙⲙⲁⲟ ⲛⲉ ⲛϩⲏⲕⲉ 20ⲧⲃⲟⲧⲉ ⲙⲡϫⲁⲥⲓϩⲏⲧ ⲡⲉⲑⲃⲃⲓⲟ 21ⲉⲣϣⲁⲛⲟⲩⲣⲙⲙⲁⲟⲕⲓⲙ ϣⲁⲩⲧⲁϫⲣⲟϥ ϩⲓⲧⲛ ⲛⲉϥϣⲃⲉⲉⲣ ⲫⲏⲕⲉ ⲇⲉ ⲉϥϣⲁⲛϩⲉ ϣⲁⲩⲕⲁⲁϥ ϩⲓⲧⲛ ⲛⲉϥϣⲃⲉⲉⲣ 22ⲉⲣϣⲁⲛⲟⲩⲣⲙⲙⲁⲟⲕⲓⲙ ϣⲁⲣⲉⲟⲩⲙⲏⲏϣⲉϣⲟⲡϥ ⲉⲣⲟⲟⲩ ϣⲁϥϫⲱ ⲛⲛⲉⲧⲉⲙⲉϣϣⲉ ⲁⲩⲱ ϣⲁⲩⲧⲙⲁⲓⲟϥ ⲧⲏⲣⲟⲩ ⲫⲏⲕⲉ ⲉϥϣⲁⲛⲕⲓⲙ ϣⲁⲩⲉⲡⲓⲧⲓⲙⲁ ⲛⲁϥ ϣⲁϥϫⲱ ⲛⲧⲙⲛⲧⲥⲁⲃⲉ ⲛⲥⲉⲧⲙⲧⲛ ⲛⲁϥ ⲙⲁ 23ⲡⲣⲙⲙⲁⲟ ⲁϥϣⲁϫⲉ ⲁⲩⲕⲁⲣⲱⲟⲩ ⲧⲏⲣⲟⲩ [ⲉ]ϥϣⲁⲛϫⲓϫⲣ[ⲟⲡ] 24[ⲛⲁ]ⲛⲟⲩ ⲧⲙⲛⲧⲣⲙⲙⲁⲟ ⲛⲟⲃⲉ ⲁⲩⲱ ⲧⲙⲛⲧϩⲏⲕⲉ ϩⲟ[ⲟⲩ] ⲙⲡⲁⲥⲉⲃⲏⲥ 25ϣⲁⲣⲉⲫⲏⲧ ⲙⲡⲣⲱⲙⲉ ϣⲓⲃⲉ ⲙⲡⲉϥϩⲟ ⲏ ⲉϩⲛ ⲡⲉⲧⲛⲁⲛⲟⲩⲟⲩ ⲏ ϩⲛ ⲡⲉⲑⲟⲟⲩ 26ⲡⲟⲩⲱⲛϩ ⲉⲃⲟⲗ ⲙⲫⲏⲧ ⲉϥϩⲛ ⲡⲉⲧⲛⲁⲛⲟⲩϥ ⲡⲉ ⲫⲟ ⲉⲧⲣⲟⲟⲩⲧ ⲁⲩⲱ ⲡϭⲓⲛⲉ ⲛⲟⲩⲡⲁⲣⲁⲃⲟⲗⲏ ⲡⲉ ⲟⲩⲙⲉⲉⲩⲉ ⲛϩⲓⲥⲉ
Copyright information for
CopSahBible2